Tankar før slåtten

-Sjølv om vermeldarane signaliserer låge temeperturar komande vekene, bør nok dei som har engareal isådd grasartar for treslåttsregime ha klart slåtteutstyret når vi bikkar over i juni- dersom ein ynskjer å slå eit gras med potensiale for høgt grovfôropptak, (og dermed også at større del av dyret sitt energi- og proteinbehov blir dekt via grovforet).

-Består grassvoren av grasartar tilpassa toslåttsregime, vil ein overgang til treslåttsregime (med slått før skyting) som oftast føre til avlingsnedgang seinare engår. Det må du ha med i reknestykket.

Vår tilråding for dei som i dag har ein grassvor tilpassa toslåttsregime, og som ynskjer å legge om til treslåttsregime, er først å fornye grassvoren med grasartar tilpassa tre slåttar, før ein legg om til tre slåttar. Hugs også på at i dei fleste buskapar vil der vere dyr som i periodar skal ha fiberrikt fôr - dvs gras slått etter skyting. Det kan vere fornuftig å ha noko areal tilpassa 2 slåttar.

Gras slått på tidleg utviklingsstadium med høgt innhald av råprotein er utfordrande å ensilere

Foropptaket til dyret er ein av faktorane som påverkar kor mykje energi og protein frå grovfôr kan utnytte. Foropptaksindeksen blir mykje påverka av kor vellukka ensileringsprosessen har vore.

Tidleg slått gras (før begynnade skyting) med høgt nitrogeninnhald er mykje vansklegare å oppnå vellukka gjæring på enn gras slått på eit litt seinare utviklingsstadium. Ei av årsakene til dette er at høgt innhald av nitrogen i graset gjev ein buffringseffekt under ensileringsprosessen- det er vansklegare å oppnå ein rask pH-reduksjon i graset. Dette fører til at det blir ein lengre fase der mikroorganismar bryt ned protein og aminosyrer, samt at vi kan få eit høgt innhald av ulike syrer i fôret m.a. mjølkesyre. Eit høgt syreinnhald i fôret reduserer opptaket av grovforet, fôropptaksinndeksen blir lågare.